TAGBILARAN CITY, Bohol, Nov. 02 (PIA)–Gihagit karon sa Malacañang ang Moro Islamic Liberation Front (MILF) sa pagtabang o paghatag og higayon sa mga otoridad sa paggukod sa mga lawless elements. Gihimo sa Palasyo ang maong pahayag taliwala sa pasidaan sa MILF nga andam nilang idepensa ang ilang teritoryo kun mosulod ang mga sundalo sa Basilan. Gitataw sa MILF nga dili kriminal si Kumander Dan Laksaw Asnawi, apan giingong biktima lang usab siya sa hustisya. Matud pa ni Deputy Presidential Spokesperson Abigail Valte, angay nga dili manghilabot ang MILF ug pasagdan na lamang nga himuon sa mga sundalo ang ilang mga trabaho nga pagpatuman sa balaod. Sigun pa ni Valte, giingong supak sa ceasefire agreement ang paghatag og proteksyon sa mga kriminal mao nga dili angay itago sa MILF ang grupo ni Asnawi.
Si Asnawi akusado sa pagpatay sa 10 ka Marines niadtong tuig 2007 ug sa 19 ka Special Forces niining Oktubre lamang.
“Either they cooperate or they stand aside and let our law enforcers do their jobs,” matud pa ni Valte. (PIA-Bohol/ecb)