6 ka HK victims, nakadawat og compensasyon

TAGBILARAN CITY, Aug. 22 (PIA) –SUKWAHI sa pahayag sa mga biktima ug kaanak sa namatay sa gitawag nga Manila hostage-taking incident, gipahayag sa usa ka miyembro sa gimugnang Incident Investigation and Review Committee (IIRC) nga duna nay nadawat nga
kompensasyon ang mga pamilya sa biktima gikan sa Pilipinas.

Matud pa ni IIRC panel member Teresita Ang-See nga tungod usab sa paningkamot sa gobyerno, nakatigom ang pribadong sektor og igong salapi isip “solidarity token” sa mga pamilya sa mga biktima.

Sigun pa sa opisyal, unom sa walo ka mga biktima ang midawat sa maong kompensasyon.

Pasabot sa opisyal, giinggong angay usab sabton sa mga survivors nga ang maong lakang pagpakita og pagpakabana sa gobyerno sa mga biktima.

Bisan wala gibutyag ang kantidad nga nadawat sa pamilya sa mga biktima, giseguro ni Ang-See nga dili “makaulaw” ang maong kantidad.

Gitakdang makig-hinabi kang Department of Justice (DoJ) Sec. Leila de Lima ang mga kaanak sa mga survivors karong adlawa. (PIA-Bohol/ecb)

Submit a Comment