TAGBILARAN CITY, Aug. 11 (PIA) – TULO ka Pinoy na ang naapektuhan sa mga nahitabong riot sa London.
Sa pag-atubang sa House Appropriations Committee, miingong si Foreign Affairs Secretary Albert del Rosario nga usa ka Pinoy ang naangol human makaagi sa lugar nga diha’y riot.
Giingong nihangyo kini nga dili na lamang ibutyag ang iyang pangalan aron dili maguol pa ang iyang pamilya sa Pilipinas.
Usa usab ka Pinoy ang nawad-an og sakyanan sa riot apan wala kini naunsa. Samtang ang ika-tulong Pinoy, nga usa ka babae ang nagub-an sa iyang tindahan apan wala usab kini hilabti.
Matud pa ni Del Rosario, padayon ang pagmonitor sa Department of Foreign Affairs (DFA) sa sitwasyon sa London dungan sa panawagan sa mga Pilipino didto nga mag-amping ug likayan una ang pag-adto sa mga lugar nga adunay kagubot.
Niadtong Sabado pa miulbo ang kagubot sa London nga nagsugod sa pakapatay sa mga pulis sa usa ka gidudahang drug dealer nga usa ka Afro-Carribean. (PIA-Bohol/ecb)
