2012 national budget gisumite na

TAGBILARAN CITY, Bohol, July 27 (PIA)–PORMAL nang gisumite sa Malacañang sa Ubos Balay Balaoranan ang proposed budget alang sa tuig 2012.  Personal nga gitunol ni Budget Secretary Butch Abad ang balaodnon sa nasudnong pondo alang sa sunod tuig nga nagkantidad og P1.818 Trillion nga misaka og 10.4 porsiyento o P171 bilyon nga motutok sa mga social projects sa administrasyong Aquino sama sa anti-corruption ug good governance, poverty reduction, edukasyon ug uban pa.

Matud pa ni Abad nga gihuman sa Palasyo og mas sayo ang proposed budget aron masugdan nang dayon ang bidding alang sa mga proyekto sa pag-abli sa tuig 2012 diin apil sa top 5 government agencies nga adunay dagku’ng pondo ang Education nga P238.8 bilyon; DPWH, P125.5 billion; Defense, P107.9 billion; Agriculture ug DSWD.

Gikan sa kasamtangang P21 bilyon nga budget alang sa Conditional Cash Transfer (CCT) program karong tuiga, nisaka kini sa P39.5 bil-yon alang sa pantawid pamilyang Pinoy aron mapalapad pa ang mga beneficiaries niini sa tulo ka milyong kabus nga Pinoy gikan sa P2.3 milyon karong tuiga.

Gikumpirma usab ni Abad nga dili mabag-o ang makuhang pork barrel sa duha ka kapulungan diin P70 milyon matag-tuig ang alang sa matag kongresista samtang P200 milyon sa mga senador.  Sa Lunes, Agosto 1 sugdan na ang deliberasyon ug gipaabot nga mahuman sa December 15 sa dili pa mag-recess ang Kamara alang sa Christmas break. (PIA-Bohol/ecb)

Submit a Comment