12 ka Pinoy missing human sa linog sa New Zealand

USA ka Pinoy ang samdan samtang 12 pa ang nangawala human mapiit ug matabuni sa
nahugnong edepisyo tungod sa 6.3 magnitude nga linog sa Christchurch City, New Zealand
sa milabay’ng adlaw.

Sa taho sa Embahada sa Pilipinas sa Department of Foreign Affairs, si Jay Payot, estudyante
sa King Education Center, nasamdad sa braso ug kamot human nihagsa ang CTV building
sa Madras St., Christchurch.

Gawas kang Payot, 12 pa ka Pinoy nga kadaghanan mga estudyante ang giingong na-trap
sa nahugnong edepisyo apil ang lima niyang kauban nga mga estudyanteng Pinoy.

Gikumpirma usab ni Linda Amantillo sa DFA nga usa ang iyang anak nga babae sa napiit sa
maong edepisyo. Giingong naka-text pa ang iyang anak sa iyang iyaan sa New Zealand ug
sa ilaha dinhi sa Pilipinas niadtong buntag sa milabay’ng adlaw, pila ka minuto human ang
linog ug nagpakiluoy nga tabangan siya.

Sa katapusang text sa iyang anak, nasulti pa niini ang eksaktong lugar sa iyang
gikabutangan.

Usa pang nawala ang giila nga si Ivy Jane Cabonillas.

Matud pa ni Foreign Affairs spokesman Atty. Ed Malaya, adunay 400 ka rescuers ang
naglihok karon sa Christchurch ug magdugang pa og 300 ka rescue men aron motabang
sa pagpangita sa mga nangawala. Gibana-banang adunay 2,000 ka Pinoy ang naa sa
Christchurch.

Gideklara na ni New Zealand Prime Minister John Key ang ‘state of emergency’ sa
Christchurch. (ecbPIABohol)

Submit a Comment