Unilateral ceasefire sa mga rebeldeng grupo, gi-deklarar ni Duterte

TAGBILARAN CITY, July 26 (PIA)–“I am now announcing a unilateral ceasefire with the CPP/NPA/NDF effective immediately and call on our fellow Filipinos in The National Democratic Front and its forces to respond accordingly.”

Kini ang usa sa mga highlight sa unang State of the Nation Address (SONA) ni Presidente Rodrigo Duterte kagahapon.

Sa iyang mensahe sa nasyon, gi-awhag niya ang tanang mga Pilipino, partikular na ang mga Moro, ug mga miyembro sa rebeldeng grupo nga tapuson na ang pila na ka dekadang pakig-away sa mga Pilipino sa isig ka Pilipino.

Matud pa ni Duterte, dili mabayran og mga medalya sa kabayanihan ug kaisog bisan sa cash assistance ang pagbangotan sa matag biyuda ug nabiling anak sa mga napatay nga sundalo ug rebelde tungod sa pakigbugno.

Target sa Presidente nga makab-ot ang malungtarong kalinaw sa Pilipinas sa dili pa matapos ang iyang unom ka tuig nga termino.

Mao nga nihangyo usab siya sa CPP-NPA-NDF nga atbangan ang deklarasyon og unilateral ceasefire sa gobyerno.

Gitakdang magsultihay og balik karong Agosto 20 hangtud 27 sa Oslo, Norway ang gobyerno ug CPP-NPA-NDF kalabot sa malungtarong kalinaw nga gipangindahay sa tanang niaging administrasyon. (ecb/PIA7-Bohol)

Submit a Comment