MANILA, May 31 (PIA)–Pormal nang gilusad kagahapon sa Department of Science and Technology (DOST) ang labing unang Pinoy weather channel.
Gitawag kining DOSTv nga nagtinguhang maghatag og kasayuran kalabot sa kahimtang sa panahon, motuki sa climate change ug disaster management.
Nanghinaot ang DOST nga mahimong dakong tabang sa mga Filipino ang ilang paglusad sa online broadcast nga gitawag nga Filipino Weather Channel.
Sa pagkakaron, matan-aw pa lamang ang DOSTv via online sa website sa DOST nga www.dostv.ph/youtube gikan Lunes hangtud Biyernes sa alas 11 sa buntag taman alas 12 sa udto.
Matud pa ni DOST Science and Technology Institute Director Richard Burgos, gusto nilang mapaabot sa katawhan ang mga bag-ong kalamboan ug kasayuran sa siyensa ug teknolohiya sa nasod.
Usa sa mahinungdanong parte usab sa maong channel ang paghatag og kasayuran sa mga mangabot nga dautang panahon sa nasod. (ecb/PIA7-Bohol)
