Samsung Galaxy Note 7, bawal na sa mga tugpahanan ug eroplano sa PH

TAGBILARAN CITY, October 21 (PIA)–Gimando na sa Civil Aviation Authority of the Philippines (CAAP) ang total ban sa mga Samsung Galaxy Note 7 sulod sa mga airports ug biyahe sa mga eroplano sa nasod.

Sa gipagawas nga Memorandum Circular No. 34-16 sa CAAP, nakalatid nga hugot nang gidili ang pagdala o paggamit sa Samsung Galaxy Note 7 sa mga tugpahanan ug sa tanang mga biyahe sa eroplano, bisan sa mga cargo flights.

Ang maong memorandum nga gi-petsahan og Oktubre 13, nagmando sa tanang Philippine carriers nga sakop sa CAAP.

Gi-abisohan usab sa CAAP ang tanang operators nga hingpit nga ipatuman ang maong memorandum circular.

Una nang ni-abiso ang Philippine Airlines ug Cebu Pacific sa tanang mga pasahero nga bawal na ang paggamit ug pagdala sa maong smartphone device sa tanan nilang flights.

Gipatuman kining mando tungod sa nagpadayong mga kaso sa pagkasunog sa Galaxy Note 7 samtang naka-charge kini.

Una niini, nagpagawas og emergency order ang US Department of Transportation (USDOT), Fede¬ral Aviation Administration (FAA) ug ang Pipeline and Hazardous Materials Safety Administration (PHMSA) aron i-bawal ang tanang Samsung Galaxy Note7 smart phone devices nga klasipikadong “forbidden hazardous material” tungod kay mahimo kining magpakayo ug mahimong hinungdan og sunog bisan nakasarado pa kini. (ecb/PIA7-Bohol)

Submit a Comment