Populasyon sa PH, naa sa 100.98-M na

TAGBILARAN CITY, May 20 (PIA)–Nikabat na sa 100.98 milyon ang populasyon sa Pilipinas karong tuig.

Mas taas kini sa 8.64 milyon kun itandi niadtong 2010 diin gipahigayon ang katapusang census sa Philippine Statistics Authority (PSA).

Base sa census sa Population (POPCEN), gikan Agosto niadtong niaaging tuig nisaka ang populasyon sa nasod og 1.72 porsyento gikan sa tuig 2010 hangtud 2015.

Ang Rehiyon IV-A nga gilangkoban sa mga probinsiya sa Cavite, Laguna, Rizal ug Quezon ang may pinakadakong populasyon nga mokabat sa 14.41 milyon niadtong niaging tuig.

Gisundan kini sa National Capital Region (NCR) o Metro Manila nga may 12.88 milyon ug Central Luzon nga may 11.22 milyon.

Sa 81 ka probinsiya sa tibuok nasod, ang Cavite ang may pinakadaghang populasyon nga may 3.68 milyon nga gisundan sa Bulacan, 3.29 milyon ug Laguna, 3.04 milyon.

Samtang ang Batanes nga adunay populasyon lamang nga 17,246 ang may pinakaubos nga populasyon sa nasod.

Nagsunod niini ang Camiguin nga may 88,478 ug Siquijor nga may 95,984 nga populasyon.

May 27 ka uban pang probinsiya usab ang may usa ka milyong population mark.

Apil niini ang Cavite, Bulacan, Laguna, Pangasinan, Cebu, Rizal, Batangas, Negros Occidental, Pampanga, Nueva Ecija, Camarines Sur, Ilolilo, Quezon, Leyte, Isabela, Bukidnon, North Cotabato, Tarlac, Negros Oriental, Albay, Bohol, Cagayan, Maguindanao, Lanao del Sur, Davao del Norte, Zamboanga del Norte ug Zamboanga del Sur. (ecb/PIA7-Bohol)

Submit a Comment