TAGBILARAN CITY, July 26 (PIA)–Gi-anunsiyo ni Presidente Rodrigo Duterte ang plano niining ubsan ang personal ug corporate income tax ubos sa iyang administrasyon.
Sa iyang unang State of the Nation Address (SONA) kagahapon, miingon ang Presidente nga parte kini sa tax reform agenda aron masayon ang koleksiyon sa buhis ug madugangan ang take-home pay sa mga mamumuo.
Matud pa ni Duterte, makapadani usab kini og mas daghang tigpamuhonan sa pagnegosyo sa nasod.
Pasabot pa sa Presidente, kun mas dako ang kita sa mga mamumuo, mas daghan kining gastuhon maong motuyok ra ang salapi sa ekonomiya.
Dungan niini, gibutyag usab ni Duterte ang plano niining luagan ang gipatuman nga Bank Secrecy Law sa nasod aron malili ang mga kuwestiyonableng bank accounts.
“On taxation, my administration will pursue tax reforms towards a simpler, and more equitable, and more efficient tax system that can foster investment and job creation. We will lower personal and corporate income tax rates and relax the bank secrecy laws,” matud pa ni Duterte.
Samtang balay ug dugang trabaho usab ang iyang gisaad alang sa mga urban poor.
Apil ang pagpasiugda og programa sa reproductive health iyang gisaad isip parte sa iyang agenda alang sa mga kabos.
Sa pagtapos sa iyang SONA, miingon si Duterte nga magpabiling yano ang iyang administrasyon ug subli niyang gibalik nga mahimong limpyo ang iyang liderato. (ecb/PIA7-Bohol)
