TAGBILARAN CITY, September 13 (PIA)–Ang pamilya Garay gikan sa Can-upao, Jagna ning lalawigan sa Bohol ang napiling regional winner sa Huwarang Pantawid Pamilya ning tuig sa Department of Social Welfare and Development (DSWD).
Human sa pagdaog sa regional search niadtong Hulyo 7, 2016, ang pamilya nilang Vicente ug Marissa Garay, mo-representar sa DSWD-7 alang sa national competition nga nipili lamang sa lima ka pamilya gikan sa 16 ka regional entries.
Ang pamilya Garay makigtigi sa uban pang pamilya gikan sa Rehiyon III, IV-A,V ug VI karong Setyembre 30.
Samtang ang national awarding ipahigayon sa syudad sa Quezon karong Oktubre 1 nga natunong sa culmination sa Family Week celebration nga gisaulog matag katapusan nga semana sa Setyembre.
“Dili g’yud namo maukit sa pulong among kalipay sa pagkadaug sa among pamilya kay ang among nadawat nga ganti nakatabang ug daku sa among pamilya ilabi na nga graduating among anak nga si Ivy ug daghan kaayong galastuhanan,” matud pa ni Marissa.
Si Ivy ang ilang kamagulangan nga gipaabot nga matapos sa electrical engineering karong Oktubre. Sunod niya si Rose Marie nga naa na karon sa 3rd year college nga nikuha sa kursong Bachelor of Education, sunod si Prince nga naa pa sa day care ug ang ilang kamanghuran nga si Vincent Ian nga lima ka bulan pa lamang.
Samtang ang ubang anak nila nga sila Aria Venice, Lee Mark ug Vic Jun mga children-beneficiaries sa Pantawid Pamilyang Pilipino program nga nagtungha sa Bohol Institute of Technology-Jagna ug Jagna Central Elementary School.
Si Vicente usa ka active religious leader ug usa ka mangingisda samtang si Marissa usa ka katabang sa panimalay nga mokita og P3, 000 matag bulan. Benepisyaryo sila sa Pantawid Pamilya program sukad 2012.
Ang Pantawid Pamilya mao ang conditional cash transfer sa gobyerno nga namuhunan sa edukasyon ug panglawas sa kabos nga mga pamilya nga adunay mga anak nga may edad 0 hangtud 18 ka bulan.
Ang Huwarang Pantawid Pamilya usa ka tinuig nga pagpangita sa DSWD og mga pamilyang adunay lig-on ug hugot nga relasyon, nagpakita og maayong pamatasan ug may positibong impak sa komunidad diin sila nagpuyo. (ecb/PIA7-Bohol)
