TAGBILARAN CITY, April 21 (PIA)–Tungod sa nasinating pagpadayon sa El Niño phenomenon, mahimong madilatar ang pagpananom og humay sa sunod nga planting season.
Kini matud pa ni National Irrigation Administration (NIA) Mario Sande atol sa Kapihan sa PIA kagahapon didto sa NIA Central Visayas Training Center.
Matud pa ni Sande nga ang panahon sa pagpananom nga kasagarang ipahigayon sa bulan sa Mayo, posibleng masibog ngadto sa Hulyo ning tuig o mas sayo pa, apan mag-agad kini sa tambag sa The Philippine Atmospheric, Geophysical and Astronomical Services Administration (PAG-ASA).
Tungod niining senaryo, gibutyag ni Sande nga sa kinatibuk-ang labaw sa 7,800 ektaryas, mga 5,983 ektaryas lamang ang ma-serbisyohan sa ikombinar nga 4 ka major irrigation systems sa Bohol – Malinao dam sa Pilar; Bayongan dam sa San Miguel; Capayas sa Ubay; ug Talibon irrigation.
Ang sitwasyon misamot sa ubang lugar diin tubod nga tubig lamang ang tinubdan sa ilang gagmay nga irigasyon.
Kahinumdoman nga ang PAG-ASA, nilakip sa Bohol sa 34 ka lalawigan diin padayon nga makasinati og grabeng epekto sa El Niño. (ecb/PIA7-Bohol)
