Pagbisita ni Duterte sa Vietnam, nagmabungahon

MANILA, September 30 (PIA)–Nahimong mabungahon ug produktibo ang working visit ni Presidente Rodrigo Duterte sa Hanoi, Vietnam.

Sa iyang arrival statement sa Davao International Airport (DIA), miingon ang Presidente nga pipila sa nahisgotan nila ni Vietnam President Trần Đại Quang mao ang pagpalig-on sa strategic partnership sa Pilipinas ug Vietnam, pagpakusog sa investment, maritime cooperation, pagbatok sa problema sa ilegal nga droga ug daghan pang ubang isyu.

Giingong nahisgotan usab nila sa Vietnamese President ang pagresolba sa tensiyon sa West Philippine Sea (WPS) diin usa usab ang Vietnam sa mga claimants sa giilogang teritoryo.

Kauban usab sa nasabotan sa duha ka lider ang unom ka tuig nga strategic partnership nga magsugod sa 2017.

Samtang subling gipasalamatan ni Presidente Duterte ang mga Pinoy nga iyang gikaatubang sa Vietnam ug gisaaran niini nga tumanon niya ang iyang mga giingong pagpadagan sa usa ka limpyo nga nasod ubos sa iyang termino.

Apan subli usab niining gipadunggan ang pipila ka ahensiya sa gobyerno sama sa Land Transportation Franchising and Regulatory Board (LTFRB), Bureau of Internal Revenue (BIR) ug uban pa nga kinahanglang tarungon ang ilang trabaho ug ipatuman ang iyang mandato nga tapuson ang mga transaksiyon sa maong mga ahensiya sulod lamang sa tulo ka adlaw gikan sa opisina sa Presidente hangtud sa barangay level. (ecb/PIA7-Bohol)

Submit a Comment