MANILA, August 26 (PIA)–Sugod karong Setyembre 15, 2016, ipatuman na sa Philippine Overseas Employment Administration (POEA) ang online registration system alang sa mga seafarer.
Ang pagbag-o sa sistema tuyong mahatagan og paspas ug hapsay nga serbisyo ang mga overseas Filipino workers (OFWs).
Kini human gi-aprubahan sa POEA Governing Board ang Resolution No. 13 Series of 2016 nga magpatuman sa maong online registration.
Gimanduan sa maong resolusyon ang POEA nga alisdan ang Seafarers Registration Certificates (SRC) ngadto na sa online seafarers’ registration.
Ang online SRC system nahisubay sa direktiba ni Presidente Rodrigo Duterte sa tanang buhatan sa gobyerno nga tun-an og balik ang mga sistema aron malikayan ang duplikasyon sa buhat, wagtangon ang mga pila ug tarungon ang paghatag og serbisyo sa publiko.
Makapahimos sa online registry ang may 50,000 ka aplikante sa SRC matag tuig ug matangtang na ang tag-as nga pila sa mga buhatan sa POEA.
