TAGBILARAN CITY, October 17 (PIA)–Gitudlo ni Pope Francis si Monsignor Alberto Uy sa Diocese sa Talibon isip bag-ong obispo sa Diocese sa Tagbilaran niadtong Octobre 13.
Si Msgr. Uy ang ika-12 nga obispo gikan sa lalawigan sa Bohol ug ika-7 nga obispo sa Bohol sukad namugna ang diocese, 75 na ka tuig ang niagi.
Hulipan niya ang 77 anyos nga si Bishop Leonardo Medroso kansang resignasyon gidawat sa Santo Papa.
Isip Obispo, si Medroso unang mi-alagad sa Diocese of Borongan sulod sa 19 ka tuig hangtud nga gibalhin siya sa Diocese sa Tagbilaran niadtong 2006.
Si Msgr. Uy kasamtangang Episcopal Vicar sa Diocese sa Talibon ug pastor usab sa St. Michael the Archangel Parish sa lungsod sa Jagna.
Ang bag-ong natudlong obispo nga lumad nga taga lungsod sa Ubay ning lalawigan, magsaulog sa iyang ika-50 ka adlaw’ng natawhan ugma, Oktubre 18.
Si Msgr. Uy nikuha sa iyang philosophical studies sa Immaculate Heart of Mary Seminary sa dakbayan sa Tagbilaran ug theology, una sa St. John Mary Vianney Theological Seminary sa syudad sa Cagayan de Oro City diin natapos niya iyang Bachelor in Sacred Theology degree ug Masters in Pastoral Ministry.
Nakumpleto niya iyang licentiate sa Sacred Theology sa Loyola School of Theology sa syudad sa Quezon.
Niadtong 2006, nakuha ni Msgr. Uy iyang doctorate sa Sacred Theology sa Pontifical Gregorian University sa Rome, Italy.
Gi ordinahan pagka-pari si Msgr. Uy alang sa Diocese sa Talibon niadtong Abril 14, 1993.
Ang instalasyon sa bag-ong obispo gitakda sa Enero 18, 2017 sa lungsod sa Talibon. (ecb/PIA7-Bohol)
