MANILA, January 26 (PIA)–Gitakdang magpatuman si Presidente Rodrigo Duterte og mas istriktong patakaran batok sa mga tapolang empleyado sa gobyerno sa sunod buwan.
“By end of February, I will impose severe restrictions on government. Unang-una yung sweldo nila ang lalaki. I will have zero tolerance for non-performing government workers,” matud pa ni Duterte sa iyang mensahe atubangan sa mga biktima sa bagyong Yolanda sa syudad sa Tacloban, Leyte kagahapon.
Gawas niini, giingong pasakaan usab og kaso nga simple o serious neglect of duty ang mga kawani sa gobyerno nga wala nakahimo sa ilang trabaho.
Matud pa sa Presidente nga mihinay ang aksiyon sa gobyerno sa daghang panginahanglan sa mga Pilipino tungod usab sa hinay nga paglihok sa mga kawani sa gobyerno.
Gimanduan niini ang mga ahensiya sa gobyerno nga aksiyunan dayon ang request o bisan unsang papeles nga gipangayo sa bisan asang buhatan ug departamento.
Gitataw sa Presidente nga ang kapaayohan ug interes sa publiko ang angay unahon.
Gi-awhag usab niini ang mga regional directors sa mga ahensiya nga mahimong maayong ehemplo diin angay kining mag-una nga moabot sa opisina ug ang katapusang mopaule.
Samtang gipasidan-an usab ni Presidente Duterte kagahapon ang mga city mayors sa tibuok nasod nga lili-on niya ang paggamit niini sa ilang intelligence fund. (ecb/PIA7-Bohol)
