MANILA, July 19 (PIA)–Gidili na sa tanang mga opisyal ug kawani sa gobyerno ug ilang pamilya ang pagsulod o pagduwa sa mga casino ug uban pang matang sa pasugalan sa tibuok nasod.
Kini human gimando ni Presidente Rodrigo Duterte nga i-ban ang mga empleyado sa gobyerno sa pagsulod sa mga casino.
Gimando sa Presidente sa Philippine Amusement and Gaming Corp. (PAGCOR) nga i-ban ang mga government employees ug ilang pamilya sa tanang casino nga gipadagan niini sa tibuok nasod.
“I would like to ask Pagcor to prohibit lahat ng taga-gobyerno, pati yung mga asawa, pamilya, to deny them entrance sa mga casinos. I do not want people lalo na sa gobyerno, papasok-pasok dyan…” matud pa ni Duterte.
Gimando usab sa Presidente ang pagsibak sa mga government employees nga masakpang wala sa ilang mga puwesto sa oras sa trabaho.
Matud pa ni Duterte nga sa higayong ma-activate na ang hotline 8888, mahimo nang mo-reklamo ang katawhan og direkta kaniya batok sa mga trabahante sa gobyerno nga magpasagad ug mo-abusar sa ilang katungdanan. (ecb/PIA7-Bohol)
