Mga nahimo sa administrasyong Duterte sa unang 50 ka adlaw, isapublko

MANILA, August 17 (PIA)–Ang Presidential Communications Office (PCO) nilusad sa kampanyang #50FirstDays o ang unang 50 ka adlaw aron idayag ang mga nahimo ug natuman sa administrasyon ni Presidente Rodrigo Duterte sukad sa iyang paglingkod sa katungdanan niadtong Hunyo 30.

Kini ang labing unang higayon nga ang usa ka incumbent President mopadayag sa iyang mga nahimo bisan sulod lamang sa duha ka bulan nga pag-alagad.

“The Duterte administration challenges the status quo of the usual 100-day milestone. We are confident that even at an early stage, we have effected change in our government while calling everyone to be our partner for change,” matud pa ni PCO Kalihim Martin Andanar.

“Change is happening everyday. It feels like everyday is a new day for a new Philippines. That is why we chose to tag it as the ’50 First Days,’” dugang pa ni Andanar.

Sa Agosto 18 sa alas 12 sa udto, ang PCO mopasundayag og documentary sa PTV-4 aron ipakita ang recap sa inadlaw-adlaw nga aktibidades ni Presidente Duterte sukad sa unang adlaw niya hangtod sa ika-50 ka adlaw sa iyang pag-alagad.

I-asoy ni Presidential Spokesperson Ernesto Abella ang maong documentary nga magpakita usab sa mga panabot gikan sa mga cabinet secretaries, ubang opisyal sa gobyerno, apil na ang mga ordinaryong Pilipino nga milaom og kabag-ohan nga moabot pinaagi sa saad sa kabag-ohan.

Usa ka interactive website diin nahisulod ang mga nahimo sa administrasyon ang ilusad usab sa ika-50 ka adlaw sa pag-alagad sa Presidente.

Pinaagi sa kampanyang #50FirstDays, nanawagan si Andanar og aksiyon sa matag Pilipino sa pagtabang sa gobyerno sa pag-implementar og dugang reporma ug nanghinaot og mga maayong kabag-ohan nga moabot pa sa atong nasod.

“Everyone is our partner for change,” matud pa ni Andanar. (ecb/PIA7-Bohol)

Submit a Comment