Mayo 9, special non-working holiday

MANILA, April 27 (PIA)–Gipahibalo karon sa Malakanyang nga gi-deklarar nga special non-working holiday ang adlaw sa piniliay sa Mayo 9, 2016.

Matud pa ni Presidential Communications Operations Office (PCOO) Kalihim Herminio Coloma Jr., nahisulod kini sa Proclamation No. 1254 nga gilagdaan ni Presidente Benigno Aquino III niadtong Abril 25, 2016.

Kini nagpasabot nga walay trabaho ang mga empleyado sa pribado ug mga ahensya sa gobyerno sa maong adlaw aron hatagan og higayon ang publiko nga makabotar sa adlaw sa piniliay sa Mayo 9 nga natunong sa adlaw nga Lunes.

Sa maong adlaw, ipatuman ang Department of Labor and Employment (DOLE) salary rules diin dugang 30 porsiyento sa inadlaw nga suholan sa mga mamumuo ang ipatong isip dugang bayad sa unang walo ka oras sa pagtrabaho.

Sa Mayo 9, labaw sa 54 milyon ka botante ang modagsa sa mga polling precincts aron mobotar alang sa nasudnon ug lokal nga posisyon.

Matud pa sa labing ulahing report sa Commission on Elections (Comelec) niadtong Disyembre 16, 2015, mokabat sa 54,363,329 ang rehistradong botante sa tibuok nasod alang sa piniliay sa 2016, mas daghan sa 52,014,648 ka rehistradong botante niadtong 2013 midterm elections. (ecb/PIA7-Bohol)

Submit a Comment