Malakanyang, mi-apela sa publiko nga mosalig sa anti-drug campaign ni Duterte

MANILA, September 30 (PIA)–Gibarogan sa Malakanyang nga angay pa gihapong saligan ang kampanya batok sa ilegal nga droga ni Presidente Rodrigo Duterte.

Kini, bisan nga may sayop sa drug matrix o talaan sa mga pangalan sa mga opisyal ug kawani sa gobyerno nga nalambigit sa operasyon sa ilegal nga droga sa nasod.

Atubangan kini sa pagpangayo og pasaylo sa Presidente tungod sa sayop dihang gilambigit sa ilegal nga droga si Pangasinan Rep. Amado Espino ug duha pa.

Matud pa ni Presidential Spokesperson Ernesto Abella, angay nga mas daygon sa publiko si Presidente Duterte tungod sa pag-ako niini sa iyang nahimong sayop bisan ni-agi man sa proseso ug validation ang maong listahan sa mga drug personalities.

Sa pagkakaron, gipaabot nga hinganlan ni Presidente Duterte ang uban pang mga opisyal nga giingong kauban sa iyang “third and final list” sa mga nalambigit sa ilegal nga droga sa nasod. (ecb/PIA7-Bohol)

Submit a Comment