TAGBILARAN CITY, August 24 (PIA)–Nanghakot og awards ang kapolisan sa Bohol atol sa ika-115 Police Service Anniversary nga gipahigayon didto sa Police Regional Office 7 sa Sugbo nga nagdala sa tema nga: “Hamon Ng Pagbabago, Pinagibayong Serbisyo.”
Usa sa highlight sa maong selebrasyon mao ang pagpanghatag og ganti ug pasidungog ngadto sa takos nga mga Philippine National Police (PNP) units ug personnel atol sa seremonya nga gipahigayon niadtong Agosto 22, 2016 didto sa Camp Sergio Osmeña, syudad sa Sugbo.
Alang sa unit awards, ang Bohol Police Provincial Office (BPPO) ang napiling Best Police Provincial Office; Tagbilaran City Police Station, ang Best Component City Police Station; ug Panglao Police Station isip Best Municipal Police Station.
Si PSupt Nicomedes Olaivar sa BPPO ang napiling Best Police Commissioned Officer for Operations samtang si SPO4 Yolando Bagotchay Jr. sa BPPO ang napiling Best Senior Police Non-Commissioned Officer alang sa individual awards.
Alang sa Project Double Barrel Top Performers, ang BPPO ang nakakuha sa unang pwesto isip Best in Project Tokhang (Provincial Police Office Category) nga gisundan sa Cebu Provincial Police Office (CPPO) ug Siquijor Police Provincial Office (SPPO).
Sa Best in House Visitation (Municipal Police Station Category), ang Batuan Police Station ang 1st place, Dimiao Police Station ang 2nd place ug Sikatuna Police Station ang 3rd place.
Ang Best in Project Tokhang (Municipal Police Station Category) nakuha sa Sikatuna Police Station isip 2nd place, samtang 3rd place usab ang Dimiao Police Station.
Ang maong tinuig nga selebrasyon nagtinguha sa pagdasig og community awareness ug kasalmotan, paghatag og pasidungog sa isig kaanib alang sa kaisog, dedikasyon ug sakripisyo sa kahimoan sa ilang katungdanan ug pagsaulog sa pagkamugna sa police service sa nasod. (ecb/PIA7-Bohol)
