MANILA, September 9 (PIA)–Gimanduan ni Department of Labor and Employment (DOLE) Kalihim Silvestre Bello III ang tanang rehiyonal nga buhatan niini sa paglusad og halapad nga kampanya batok sa ilegal nga kontraktuwalisasyon ug ‘endo’ aron masiguro nga hugot nga gipatuman ang katungod sa mga mamumuo sa seguridad sa trabaho.
Matud pa ni Bello, gusto nilang pamatud-an nga seryoso ang ahensya nga kunhoran ang ‘endo’ sa 50 porsiyento karong 2016 ug padayon na kining mawala sa 2017.
Gimanduan usab sa Kalihim ang tanang regional director nga doblehon ang ilang pagpaningkamot sa pagpahigayon og konsultasyon ug dayalogo partikular na sa mga nag-unang sektor diin malukpanon ang kontraktuwalisasyon ug ‘endo’.
Apil sa mga nag-unang sektor ang hotel ug restaurant, manufacturing, health ug wellness, malls, food chains, agricultural plantation ug corporate farms.
Gibutyag usab ni Bello nga kasamtanang gimugna sa DOLE ang pamphlet alang sa mga sagad nga pangutana kalabot sa kontraktuwalisasyon ug ‘endo’ ug ipanghatag kini sa tibuok nasod. Ibutang usab kini sa website sa tanang opisina ug ahensiya sa DOLE.
Matud pa sa DOLE nga gidili ang labor-only contracting. Kini nagpasabot nga ang labor-only contracting, o kadtong mga kasabotan diin ang contractor o subcontractor nga tig-recruite, tig-supply o tigpadala lamang og mga mamumuo aron mo-trabaho o maghatag og serbisyo sa usa ka principal, ipahunong na. (ecb/PIA7-Bohol)
