TAGBILARAN CITY, September 26 (PIA)–Pormal nang gi-aprubahan sa Department of Social Welfare and Development (DSWD) karong adlawa ang implementing rules and regulations alang sa Centenarians Act of 2016 sa pagpanguna ni Kalihim Judy Taguiwalo.
Tungod niini, makadawat na og P100,000.00 Centenerian cash gift gikan sa gobyerno ang bisan kinsang Pilipino sa Pilipinas ug bisan ang mga tua sa ubang nasod nga makaabot sa ika-usa ka gatos ang pangedaron o kapin pa.
Makadawat usab sila og Letter of Felicitation o sulat gikan kang Presidente Rodrigo Duterte.
Ubos usab sa Republic Act 10868, ang mga Pilipino nga moabot sa ilang pangedaron nga ika-usa ka gatos nga tuig karong tuiga hatagan og Plaque of Recognition ug cash incentive gikan sa lokal nga kagamhanan sa gipuy-ang lungsod isip parte sa tinuig nga Elderly Filipino Week.
Kauban sa mga ahensiyang aprubado sa Centenarian Act ang Department of Interior and Local Government (DILG), Department of Health (DoH) ug Commission on Filipino Overseas.
Matud pa ni Kalihim Taguiwalo, angayan lamang kini aron mahatagan og respeto ug tinuod nga paghatag og bili ang mga Filipino centenerian.
Gawas niini, gipahinumdoman sa DSWD nga hatagan og prayoridad ang mga senior citizen sa ilang mga departamento ug welfare desks. (ecb/PIA7-Bohol)
