Tagbilaran City, Bohol – SI Lt. Col. Romeo Brawner Jr., ang Commander sa Special Forces
sa Armed Forces of the Philippine (AFP) dinhi sa lalawigan sa Bohol miuyon sa sugyot
ni Senador Gringo Honasan nga himuong close door ang gipahigayong pagpakisusi sa
giingong anomaliya sa pagdumala sa gahing pondo sa Armadong Kusog sa nasud.
Kini tungod kay ang maong imbestigasyon nga gipahigayon sa Senado midahig og mga
dagkong opisyales sa militar.
Giluwat ni Brawner kining maong pamahayag agig reaksiyon sa gisangpotan ni Ret. Gen.
Angelo Reyes.
Gipahayag usab ni Brawner atol sa programang Inyong Alagad sa istasyon DYRD-AM
nga mas maayo nang dili e-live coverage sa telebisyon ang imbestigasyon aron malikayan
ang “trial by publicity” tungod kay murag sad-an naman ang pagtratar sa mga nag-
imbestigang Senador ngadto sa ilang mga gipang-imbita.
Sa tan-aw ni Brawner, murag gipaka-ulawan raman sa mga Senador ang mga gipang-dapit
nga mga resource persons. Nanghinaut usab si Brawner nga likayan na unta ni Senador
Trillanes nga himuong personalan ang iyang pagpangutana sa ilang mga resource persons
nga ilang gipang-imbitar ngadto sa Senado.
Ang mga anomaliyang gipang imbestigahan sa Senado karon giingong dugay nang nahitabo
ug gani duna nay mga lakang sa pag-reporma sa sistema sa AFP apil na niini ang pagpa-
usbaw sa mga suholan sa mga kawani niini gawas pa nga nabilanggo naman gani ang mga
gipasanginlan.
Matud pa nga dugay nang giwagtang ang opisina sa comptroller sa AFP og gihulipan na
og upat ka nagkalain-laing buhatan nga maoy nag atiman sa paggasto sa pondo sa militar.
(PIA-Bohol/lvbongosia)
