TAGBILARAN CITY, November 22 (PIA)–Gipasidan-an sa Food and Drug Administration (FDA) ang publiko sa pagpalit sa pipila ka branded nga mga tambal tungod sa pagkatap sa mga pekeng produkto.
Base sa FDA advisory, apil sa mga nakuha nilang sample nga nadiskobrehang peke nga nikatap sa kamerkadohan mao ang Dolfenal, Tuseran Forte, Diatabs, Alaxan ug Neozep.
Susama ra gayud ang peke sa tinuod nga produkto mao nga lisod alang sa usa ka konsumidor nga mahibaw-an kun tinuod ba o peke ang tambal.
Mao nga tambag sa FDA, mopalit lamang og tambal sa mga botikang otorisado sa ahensiya.
Gi-awhag usab sa FDA ang mga lokal nga kagamhanan nga siguradohong walay counterfeit drugs o pekeng mga tambal ang mabaligya sa mga tindahang naa sa ilang hurisdiksyon.
Matud pa sa FDA nga peligroso ang pag-inom sa mga peke o dili rehistradong tambal tungod kay posibleng wala kini epekto o makasamot pa sa sakit nga gihambin. (ecb/PIA7-Bohol)
