Early registration sa mga pampublikong tunghaan, gisugdan na

MANILA, January 30 (PIA)–Gisugdan na niadtong Sabado, Enero 28 ang early registration program sa Department of Education (DepEd) alang sa tanang bata nga motungha sa kinder, grade 1 hangtud grade 10 sa mga pampublikong tunghaan sa nasod sa umaabot school year 2017-2018.

Matud pa ni DepEd Kalihim Leonor Briones, tumong sa early registration nga matumbok og sayo ang posibleng problema nga atubangon sa mga opisyal sa tunghaan, mga ginikanan ug mga batang motungha sa dili pa moabot ang regular nga enrollment sa Hunyo.

Gipasalig sa DepEd nga hatagan nila dayon og pagtagad ug solusyon ang unsa mang problema nga motumaw sa early registration.

Matud pa ni Briones nga target nila sa sayong pagparehistro ang mga batang may edad 5 ka tuig nga mosulod sa kindergarten ug ang mga motungtong sa grade 1 hangtud grade 10.

Modagan ang early registration hangtud Pebrero 24, ning kasamtangang tuig.

Samtang gimanduan ni Briones ang mga school division, superintendent ug principal sa tibuok nasod sa pagpahigayon og mga aktibidad aron mapahibaw sa publiko ang kalabot sa early registration sama sa pagpahigayon og house-to-house campaigns ug pakigtinabangay sa mga opisyal sa barangay.

Ang mga bata nga motungtong na sa lima ka tuig sa Hunyo 1 dawaton na sa kindergarten ug ang naka-kumpleto na sa kindergarten dawaton na usab sa Grade 1. (ecb/PIA7-Bohol)

Submit a Comment