Duterte, may mando sa BIR ug Customs

MANILA, July 20 (PIA)–Gitahasan na ni Presidente Rodrigo Duterte ang Bureau of Internal Revenue (BIR) ug Bureau of Customs (BoC) nga unahon og gukod ang mga dato o oligarkong naglikay ug wala nagbayad og buhis.
Matud pa mismo sa Presidente, sila ang mga nagpahimos sa mga prebilihiyong gihatag kanila sa mga korap nga kawani ug opisyal sa gobyerno.
Gusto ni Duterte nga tangtangon ang tax exemptions sa pipila ka mga negosyante partikular na sa mga mahilig magpalusot sa ilang mga kargamentong mosulod ug mogawas sa nasod.
Kini base sa nadawat nga kasayoran sa Presidente nga P300 milyon matag adlaw ang alkansi sa gobyerno sa mga mosulod nga kargamento tungod sa pagpakigkunsabo sa pipila ka korap nga opisyal sa mga pantalan.
Gipasabot ni Duterte nga mapondohan ang panginahanglan sa katawhan sa mga nag-unang serbisyo kun maayo lamang ang pangolekta sa buhis. (ecb/PIA7-Bohol)

Submit a Comment