TAGBILARAN CITY, September 27 (PIA)–Nipasidaan ang Department of Labor and Employment (DOLE) sa publiko batok sa mga bogus o pekeng gihanyag nga trabaho nga gipakatap sa mga social media accounts sama sa email ug Facebook.
Gipagawas ni DOLE Kalihim Silvestre Bello ang pasidaan human gipahayag sa Philippine Overseas Employment Administration (POEA) ang licensed recruitment agencies apil na ang mga job applicants sa mga gitanyag nga trabaho sa ubang nasod pinaagi sa e-mail foreign manpower agencies.
Matud pa ni Bello, nakadawat sila og kasayoran gikan ni POEA Administrator Hans Leo Cacdac nga usa ka Omegal Manpo¬wer Services Limited, nga matud pa naka-base sa nasod sa Ireland ang nagtanyag og komisyon sa mga interesadong manpower brokers o indibidwal nga maka-suplay og trabahante alang sa nagkalain-laing job openings sa Canada, Mexico ug Europe.
Tungod niini, gipasidan-an ni Bello ang publiko nga magbantay gayud sa maong tanyag.
Matud pa sa POEA, ang Omegal misaad sa mga local recruiters nga makadawat og kapareho sa usa ka buwang suholan ang matag usa ka overseas Filipino workers (OFWs) nga maka-recruit alang niini isip komisyon.
Gipangita sa POEA ang online presence sa maong manpower company nga giingong naka-base sa Ireland apan napamatud-ang negatibo kini. Giingong wala’y ahensiya nga gihinganlan og Omegal Manpower Services Limited.
Tungod niini, gitambagan ang mga nangita og trabaho nga siguradohong lehitimo ang job offers pinaagi sa verification system sa POEA ug sa website nga poea.gov.ph, mobile phone application, o pagtawag sa telepono (02) 722-1144 ug 722-1155. (ecb/PIA7-Bohol)
