DOE-Visayas, nipasidaan batok sa paggamit sa LPG-refilled canister

TAGBILARAN CITY, September 14 (PIA)–Gitinguha ang pagdili na sa hingpit sa tanang dapit sa Visayas sa paggamit sa mga liquefied petroleum gas (LPG)-refilled butane canister.
Matud pa ni Department of Energy (DOE) Visayas Director Antonio Labios, hingpit gyud nga gidili ang paggamit sa LPG-refilled butane canister tungod kay naghatag kini og kakuyaw sa sunog gumikan kay dili na man masubay ang standard nga gikinahanglan alang sa luwas nga paggamit niini.
Si Labios nitumbok sa kabalaka sa kaluwasan kalabot sa baratong kantidad sa pagpa-refill sa LPG canister taliwala sa pagdagsang sa mga ilegal o backyard refilling sa LPG o butane canisters.
Ang pagpa-refill sa butane canisters nagkantidad lamang gikan P8.50 ngadto sa P12.00 kun itandi sa pagpalit og LPG nga nagkantidad og kapin P200 alang sa 2.5 kilograms ngadto sa P600 alang sa 11 kilograms.
Gibutyag ni Labios nga nidagsang ang LPG-refilled canisters sa Mindanao ug Cebu ug nagsugod na karon og tubo sa Negros Oriental ug Leyte.
Ang DOE-Visayas nakatala na og tulo ka pagbuto tungod sa paggamit sa LPG-refilled butane canisters sa Cebu apan wala hinuo’y natala nga na-angol sa maong pagbuto.
Gipalig-on na karon sa DOE-Visayas ang pag-monitor sa mga ilegal o backyard refilling sa LPG sa tibuok rehiyon apan matud pa ni Labios nga limitado lamang ang ilang aksiyon tungod sa kakulang sa manpower diin may 6 lamang ka inspectors alang sa tibuok rehiyon.
Ubos sa Presidential Decree 1865, ilegal ang pagnegosyo, pagbaligya, pag-distribute o paghakot sa LPG-refilled canisters ug kadtong mapamatud-ang molapas niini pahamtangan og duha hangtud sa lima ka tuig nga pagkabilanggo ug multa nga nagkantidad og P20,000 taman P50,000. (ecb/PIA7-Bohol)

Submit a Comment