TAGBILARAN CITY, September 27 (PIA)–Gi-awhag sa Department of Interior and Local Government (DILG) ang kapin sa 42,000 ka barangay sa tibuok nasod sa pagpahigayon sa Barangay Assembly karong Oktubre 9, 2016.
Ubos sa Proclamation No. 260 nga gipagawas niadtong Setyembre 30, 2011, gi-deklarar ang katapusang Sabado sa Marso ug ikaduhang Domingo sa Oktubre 2011 ug sa mga mosunod nga tuig isip barangay assembly days.
Nagdala sa tema nga “Para sa Isang Tunay na Pagbabago, Mag-MASID, Makisali at Makiisa sa Isang Maka-MASAng Asembleya.”
Matud pa ni DILG Kalihim Ismael Sueno, ang ikaduhang barangay assembly ning tuig kinahanglang maglakip sa mga hisgotang naka-apekto sa barangay sama sa problema sa ilegal nga droga, kahimtang sa kahapsay ug kalinaw, disaster preparedness ug solid waste management, ug uban pa.
Sa usa ka direktiba, si Sueno nimando sa mga opisyal sa barangay sa pagtuki sa ilang compliance o pagsunod sa ubang DILG circulars sama sa programa sa DILG nga MASA-MASID o Mamamayang Ayaw Sa Anomalya, Mamamayang Ayaw Sa Ilegal na Droga, paggahin sa parte sa annual budget alang sa programa ug kalihokan alang sa anti-illegal drugs, ug pagpakusog sa Barangay Anti-Drug Abuse Councils.
Gipaabot usab gikan sa mga punong barangays ug sanggunian nga mohatag sa ilang State of the Barangay Addresses (SOBAs) nga maglakip sa pag-presentar sa ilang mga nahimo ug financial reports gikan sa unang semester sa 2016.
Gimanduan usab ni Sueno ang mga opisyal sa barangay sa pag-imbitar sa mga miyembro sa faith-based groups nga anaa lamang sa barangay sama sa Ugnayang Barangay at Simbahan (UBAS), civil society ug ubang community organizations sa pagtambong sa maong asembliya ug mohatag sa ilang suporta ug pakiglambigit sa project monitoring ug evaluation ug pag-adbokar sa good local governance.
Ang DILG, pinaagi sa ilang National Barangay Operations Office (NBOO) ang manguna sa preparasyon alang sa national barangay assembly ikaduha matag tuig.
Ang adlaw sa barangay assembly ipahigayon sa Oktubre 9 isip parte sa ika-25 nga anibersaryo sa Local Government Code nga selebrasyon ning tuig. (ecb/PIA7-Bohol)
