Comelec, nipasidaan batok sa online bullies karong eleksyon

MANILA, May 03 (PIA)–Nipasidaan ang Commission on Elections (Comelec) sa mga online bullies dungan sa nagsingabot na pinliay sa Mayo 9.

Matud pa ni Comelec Commissioner Rowena Guanzon, ang hate speech, hulga sa rape o pagpanakit ug uban pang matang sa pag-bully online mahimong basehan sa pagsang-at og kaso.

Gihimo ni Guanzon ang pasidaan sa iyang Twitter account dungan sa nagkadaghang kaso sa online bullying tungod sa mga isyu sa eleksyon.

Miingon kini nga maatubang sa election offense ang bisan kinsang mapamatud-ang nang-bully ubos sa Omnibus Election Code ug kasong libelo ubos usab sa Revised Penal Code.

Kun migamit sa tinuod nga pangalan ang violator, mahimong pangitaon kini sa Comelec sa listahan sa mga rehistradong botante. (ecb/PIA7-Bohol)

Submit a Comment