TAGBILARAN CITY, Bohol, July 5 (PIA)–Miseguro ang Commission on Elections (COMELEC) nga andam silang mosunod sa mahimong desisyon sa Korte Suprema sa mga petisyong gipasaka nga mikuwestyon sa balaod nga nagbalhin sa piniliay sa Autonomous Region in Muslim Mindanao (ARMM) sa Agosto 8.
Matud pa ni Comelec Chairman Sixto Brillantes, gihulat na lamang nila ang mahimong pinal nga aksyon sa Korte Suprema ug andam silang mosunod niini. Kun imando sa Korte Suprema nga ipadayon ang piniliay sa ARMM, mangayo sila og dugang duha ka buwan aron maandam ang tanang mga kinahanglanon apan mahimong mano- mano na lamang kini og dili na automated tungod sa kakulang sa preparasyon.
Gipahayag ni Brillantes nga apil sa mga pagpangandam sa Comelec ang bidding ug printing process nga nanginahanglan og igong panahon. (PIA-Bohol/ecb)
