SAKSAKAN ang dinung-ag nga kan-on sa duma, kini maoy bag-ong sugyot ni Presidente Gloria Macapagal-Arroyo ngadto sa mga Pilipino aron kunhoran ang bug-at nga palas-anon sa nagmahal nga paliton.

Mga duma, sama sa kamote, gabi, paw, apale ug saging isagol sa nilung-ag aron mapun-an ang kan-on samtang tukma nga matubag niini ang panginahanglan sa lawas sa carbohydrates.

Sa pagpakatap sa kampanya sa sinaksakan o “Sinanduloy”, gibugtaw sa pamuno nasud ang sugyot ngadto sa mga Pinoy nga anaa nanimuyo sa mga syudad nga mobalik sa kamote ug uban pang root crops aron tabukon ang ekonomikanhong kalisud karon.

Dinhi sa Bohol, una na usab nga gipanawagan sa lokal nga mga tinugyanan ang pag-dalit sa samang pagkaon aron kunhoran ang panginahanglan sa humay nga karon nag-nihit sa international nga merkado.

Sa programang gikampanya sa Pangulo, kini iyang gilauman nga makatabang usab aron mobalik sa pagpananum ang katawhan kay mabuhi ang kamote bisan sa backyard garden ug dili na sa umahan.

Ang kampanya karon gihimo na usab nga usa ka indigay sa mga local nga kagamhanan sa silingang lalawigan sa Sugbo ug matud ni Governor Gwendolyn Garcia, iyang gantihan ang mga mananaug sa dili pa motapos ang tuig.

Niiini, gipadayag usab sa Presidente nga laraw niyang sagopon ang sinaksakan sa usa ka nasudnong kampanya aron himoon ang Pilipinas nga dili na kaayo magsalig sa humay.

Sumpay niya, sa nagpanghitabo nga padayong pagnihit sa humay, mahimong ang Pilipinas magtutok na sa pagpatanum kay sa mamalit kini gikan sa gawas aron tubagon ang panginahanglan sa pagkaon. (rachiu/PIA)

Headlines
Balitang Bisaya