Bohol News Daily

Sakop sa Kabinete ni Noynoy nga way hanaw sa trabaho, paluwaton

HUMAN sa pagsuway sa kalig-on sa kagamhanan sa pagsagubang sa krisis, nanawagan ang mga beteranong magbabalaod nagdto sa mga sakop sa kabinete ni Presidente Benigno S Aquino III: ayaw nag huwata pa ang kompirmasyon, luwat na mo’s katungdanan.
Tan-aw sa mga beteranong magbabalaod, may mga sakop sa Cabinete nga nagtuon pa’s trabaho, butang nga wa kinahanglana karon sa Commission on Appointments (CA).
Matud nila Representatives Ma. Milagros Magsaysay (Lakas-Kampi, Zambales) ug Luzviminda Ilagan (Gabriela Party-list), ang kawalay hanaw sa mga Kabinete sa paghatag alibyo sa pag-atras sa ekonomiya dala sa krisis sa Agusto 23 mao nay labing maayong sukdanan kon si kinsa kanila ang angay palutson sa CA.
Partikular nga gisaway nila si Tourism Secretary Alberto Lim, kay nila pa, ang paglangay ni Lim pagsapnay sa suliran sa pagkahadlok sa mga turista, daku nag gikawala sa industriya sa turismo sa nasud.
Matud nila, dagwayg wa masayod si Sec. Lim sa iyang trabaho ilabi na sa pagtigum unta sa tourism promotion board aron tapakan ang buslot ba epekto sa pagkamatay sa walo ka turista didto sa hostage sa Quirino Grandstand.
Butyag nila, mahimo nga hangyoon ni Lim ang mga operators sa resorts ug hotels pagtanyag og espesyal nga pribilihiyo sama sa diskwento sa mga turista aron ma-enganyo pagsuroyg balik.
Angayan ang kalihim sa DoT nga molihok gilayon aron sagubangon ang suliran kay buot nato nga ang maglingkod ngadto pro-active ang kinaiya, matud ni Magsaysay.
Dinalian nga pagluwas sa nagun-ob nga imahen sa turismo sa Pilipinas ang labing daling gikinahanglan, sumpay ni Marikina City Rep. Marcelino Teodoro, segun sa mga taho. (PIA)

Bookmark or Share this Article to

Tags: Commission on Appointments (CA), President Benigno Aquino III, Tourism Secretary Alberto Lim
Posted in Headlines, National News | No Comments »