Bohol News Daily

News, Events, Press Release and Updates in Bohol and Around the Philippines

Palasyo: Ipadali ang pagpatuman sa Panglao airport, super regions

Written by Misael on 14 May 2008

SAMTANG gimandu na sa Malakanyang ang pagpadali sa mga proyektong imprastraktura nga napailawom super regions, gipalanog usab sa dyutay nga pundok sa mga Bol-anon ang ilang tinguha nga ipatin-aw una ang laraw alang sa Panglao International Airport (PIA) sa dili pa kini himoan og seremonyas sa Mayo 20.

Mismo si Presidente Gloria Macagapal-Arroyo ang mangunay ug lubong sa time capsule nga mag-unod sa planong pangkaugmaran sa Panglao Island Tourism Estate sa iyang ikaduhang pagbisita sa Bohol ning tuiga.

Kini kay mituo ang Presidente nga ang Panglao Airport nga sakop sa planong super regions makatabang sa pagpatunhay sa kaugmaran nga karon gigastohan sa kita sa nasud sa export ug sa remittances gikan sa overseas Filipino workers (OFWs).

Aron kini matuman, gimandu na ni Arroyo ngadto sa Budget department aron sa pagpakigsabot tali sa mga ahensya nga natungdan aron mapadali ang pagpagawas sa pundo alang niini.

Kini samtang usa ka Pro-Performance System ug Procurement Transparency group ang nahulma na aron magmonitor, magpagawas ug mga advisories ug magahimo ug lakang aron solbaron ang mga ginagmayng suliran nag ikahibalag sa pagpatuman sa super regions.

Usa ka Administrative Order No. 206 ang giluwatan sa Pangulo ngadto sa gitawag ug Super Region Champions aron hingusgan nila ang pagminitor sa ipahimutang nga imprastraktura aron mapadali ang pagpabarug niini.

Dinhi sa Bohol, ilawom sa landong sa Boholanos for Truth Accountability and Reforms, mipasilong ang Boholanos against Corruption, oppression and Social Harrassment ug pipila ka mga relihiyoso nga nangutana kon unsa gayud ang buhaton sa usa ka international airport sa gamay nga isla sa Panglao.

Sa usa ka forum sa Tagbilaran, gibungat ni professor Ernesto Pernia nga ang pagwaldas sa P4.2B nga international airport alang sa Panglao wala magtan-aw sa kalisud nga naghari pa sa 2 sa matag lima ka Bol-anon.

Sa laing bahin, sa susamang posisyon nga iyang gihuptan sa dihang gisugdan niyag pangutana ang kalantip sa desisyon sa airport, si Agustin Cloribel miingon nga ang Airport sa Panglao magkinahanglan og 12 ka flights matag adlaw aron makabawi, butang nga maghimo ug suliran sa carrying capacity sa isla.

Hinuon, si Gob. Erico Aumentado mibutyag na nga andam na ang tanan alang sa pag-abot sa Presidente ug wala nay bisan kinsa pa nga makapugong sa laraw sa tugpahanan alang sa Panglao Bohol. (rachiu/PIA)

Bookmark or Share this Article to