DILI makahimo si Commission on Higher Education (CHED) chief Romulo Neri nga magbuot-buot lamang sa P248B nga pundo sa Social Security System (SSS) aron gastohon alang sa mga programa sa kagamhanan batok sa kawad-on.

Kini human mitumaw ang spekulasyon nga ang pagtudlo ni Neri sa SSS laing pahiluna sa Malakanyang aron kawkawon ang pundo sa SSS ug gastohon sa mga programa niini batok sa kawad-on.

“Komisyon ang gihuptan ni Neri ug kay commission, ang mga desisyon dungan kining hukman sa sakop niini, matud ni Presidential Spokesperson Jesus Dureza.

Dugang pasabot sa Palasyo, may media nga magtuki sa tanang buhat ni Neri ug segurado sila nga dili mamilok ang mata sa oposisyon sa pagbantay niini.

Sa laing bahin, si Executive Secretary Eduardo Ermita, mipadayag nga si Neri gitudlo nga mangulo sa bag-ong gilusad nga “National Social Welfare Program,” apan wala siyay gahum nga mag-inusarang mohukon unsaon pag-gasto sa pundo sa NSWP.

Sa NSWP, naghiusa ilawom sa usa ka pandong ang Department of Social Welfare and Development (DSWD), Department of Health (DoH), Government Service Insurance System (GSIS), SSS, ug uban pang ahensya nga nagtutok sa paghatag sa serbisyong sosyal.

Pasabot ni Ermita, may pundo nga kita sa EVAT sa lana, ug kini gitagana aron sa mga tumong sa NSWP.

Matud sa mga tinubdan, P4B nga gikan sa EVAT na ang nagasto sa kagamhanan aron ipabaha ang subsidy sa koryente, scholarships ug pahuwam sa nga estudyante, ug sa tabang pinansyal ngadto sa public utility vehicles sa ilang paghulip ug makina ngadto sa LPG.

Matud ni Dureza nga layo sa tinuod nga magamit ni Neri ang pundo sa SSS kay kini nga kwarta sa SSS gibantayan usab sa mga unyon sa ahensya. (rachiu/PIA)

National News