WALA PA MAN hingpit kahukmi sa mga mayor nga sakop sa League of Municipalities of the Philippines (LMP) ang pagpa-undang sa mga illegal nga scrap metal buyers, gilauman sa mga tigpaniid nga kini matinuod sa dili ra madugay.

Una na nga gituki sa tigum sa LMP ang hisgutanan tungod sa namatikdang pagtaas sa mga kawat ilabi na sa mga butang nga mahalin isip scrap metal.

Kapin kon kulang 3 na ka lungsod ang mitaho nga gikawatan ang ilang mga pampublikong pasilidad sa mga service dropwire tungod sa bronse nga mahalin gikan niini.

Hinuon, buot ni Jagna Mayor Exuperio Lloren nga kon may buhaton man ang LMP sama sa unang gisugyot nga permanenteng pagdili sa pagpamalit sa mga nagsuroy-suroy nga scrap metal buyers, kini angay gayud nga kahukman sa tanang mayor aron dunganan ug pagpatuman.

Mipadayag si Maribojoc Mayor Leoncio Evasco nga gani, ang suliran sa junk buyers mas grabe pa kay gawas nga wala kini silay mga permit, migamit pa sa mga bata ug kini maoy nag-aghat sa daghanang mga kawat nga nagpanghitabo.

Gipaabot usab nga hukman na kini sa mga mayor sa ilang sundo nga tigum. (rachiu/PIA)

Headlines