INDEPENDENTE nga pundok nga mohimo ug audit sa mga dagkong kompanya sa lana, kini maoy lakang sa kagamhanan luyo sa sugyot nga wagtangon na ang oil deregulation law.

Ang lakang sa kagamhanan subay sa resolusyon nga gisang-at ni Deputy Minority Leader Roilo Golez.

Alang sa pagpanalipud sa interes sa publiko, ang Department of Justice (DOJ) ug ang Department of Energy (DOE) maoy gitugyanan sa pagtuki sa financial records sa Petron, Pilipinas Shell Petroleum Corp. ug Chevron Philippines, kinsa nailhan sa ngalan nga Caltex.

Matud ni Energy Secretary Angelo Reyes, bag-o lang silang naglagda-ay ni DOJ secretary Raul Gonzalez sa usa ka memorandum of agreement aron katugahan ug gahum ang independent audit team.

Pasabot ni Reyes nga ang joint task force may gahum na nga “magpa-summon sa mga katawhan ug mga dokumento nga gikinahanglang matan-aw sa bahan.”

Buot masayran sa kagamhanan kon duna ba gayud kapasikaran ang pagpataas sa presyo sa gasoline ug krudo ug nga wala kini patungi sa dagkong ganansya.

Una na nga nagduda ang mga magbabalaod sa pamaagi sa pagbaligya sa lana ug gasoline nga may halos parehas nga presyo ug dungan nga pagtaas bisan sa dili parehas nga pagmaagi pagpadeliver sa gasoline sa ilang mga tagsa-tagsa ka depot.

Kini maoy gidudahan nga may pag komboya sa mga kompanya nga supak sa pangpubliko nga interes. (rachiu/PIA)

Headlines