‘Local News / Bohol Balita’ Articles
Written by boholbalita on 11 March 2010
PATAY nang nakaplagan ang usa ka lalaki human nahagbong sa usa ka atabay diin gitabangan og paak ang biktima sa tulo ka ugahipon nga bitin kun Philippine Cobra didto sa Sitio Paypay, barangay Aligway, Maribojoc, Bohol kagahapon sa buntag.
Giila ang biktima nga si Christopher Rasonabe, 22-anyos, ulitawo, nagpuyo sa Sitio Cavancan, barangay Cabawan sa samang lungsod.
Sigun sa taho sa kapulisan nga ng biktima napalgan mga alas 6 sa buntag didto sa atabay ni Benjamin Tinai, 37-anyos, minyo kinsa nagpuyo duol sa dapit.
Giadtuan kini sa mga sakop sa Maribojoc Police Station kuyog ni municipal health officer, Dr. Perpetuo Belderol aron kuhaon ang patay’ng lawas niini apan nakit-an na lamang nga ang liog sa biktima gilikosan pa sa usa ka bitin.
Si PO3 Edilberto Calipes sa Maribojoc PNP nibutyag nga sigun sa uyoan sa biktima nga si Victorino Rasonabe diin kini nagpuyo nga si Christopher gikatahong nawala niadtong Dominggo sa gabii human kini nidagan dihang dunay gikaaway samtang nag-inom sa usa ka balay nga gipanag-iyahan sa usa ka Leuterio.
“Malagmit nga nahagbong ang biktima gumikan kay dili kini suhito sa maong lugar.” asoy pa ni Calipes.
Nibutyag si Calipes nga ang atabay adunay gilawmon nga upat ka tiil kapin kun kulang.
Matud ni Calipes nga basi sa gihimong otopsiya ni Belderol nga namatay ang natumbok nga biktima gumikan sa mga pinaakan sa bitin ug nalumos sa nahisgutang atabay nga wala na gamita ug walay nakit-an tinunto nga nagpaluyo sa kamatayon niini. (Andy Nalzaro)
Posted in Local News / Bohol Balita | No Comments »
Written by boholbalita on 11 March 2010
UPAT ka mga armadong lalaki kinsa nagpakaaron-ingnon nga mga kustomer nitulis sa usa ka tindahan sa merkado publiko sa Poblacion Centro, Clarin, Bohol kagahapon sa hapon.
Giila ang biktima nga si Elpidia Revilla, 51-anyos, minyo, usa ka negosyante, tag-iya sa Tano Store ug nagpuyo sa samang dapit.
Nahitabo ang insidente mga alas 2 sa hapon samtang duha ka motorsiklo nga dunay upat ka tawo nga sakay, usa niini usa ka Kawasaki Barako ug ang usa ka skeletal nga binabaye nga klase ug pulos walay plaka nihunong tungod sa maong tindahan. Tulo sa mga suspetsado ninaug nisulod sa tindahan ug nagpasumangil nga mopalit og upat ka ream nga sigarilyong Marlboro dihang ang duha niini nibunlot og duha ka mugbong pusil ug gitionan ang kahero nga si Edwin Revilla, 30-anyos,minyo ug anak sa tag-iya dayong deklara og hold-ap.
Matud sa taho, nga usa sa mga suspek nilukso duol sa drawer ug gipangkuha ang tanang salapi nga mokabat ngadto sa P20,000.
Nisibat ang mga suspetsado luwan sa duha ka motorsiklo paingon sa direksiyon sa lungsod sa Inabanga.
Gisuwayan og gukod sa mga sakop sa Clarin Police Station ang mga gikatahapan apan pakyas kini sa pagdakop niini.
Gihulagway ang mga suspek nga nagpangedaron og 30-anyos, pulos naka-jacket ug usa niini adunay marka nga Du Ek Sam ug pulos nagkalo. (Andy Nalzaro)
Tags: local crimes
Posted in Local News / Bohol Balita | No Comments »
Written by boholbalita on 11 March 2010
NAANGOL ang usa ka municipal kagawad human aksidenteng nakapunggit ang motorsiklo nga iyang gimanehoan didto sa nasudnong dalan sa barangay West Poblacion, Garcia Hernandez, Bohol niadtong nakalabay nga Dominggo sa gabii.
Biktima nailhan nga si Mario Moran, 39-anyos, minyo, sakop sa Sangguniang Bayan sa maong lungsod ug nagpuyo sa barangay East Poblacion. Nakangkon ang biktima og bun-og sa iyang ulo ug gidala sa Guido Lim Hospital sa lungsod sa Valencia apan gibalhin didto sa Jagna Hospital aron ipa-CT scan.
Nahitabo ang insidente mga alas 7:30 sa gabii samtang ang biktima nagmaneho sa iyang Honda XRM kolor asul nga motorsiklo nga nagtangag sa plaka 3442 GK dihang pag-abot sa maong lugar aksidenteng nakapunggit ang abanteng ligid sa iyang sakyanan sa usa ka Arcangel Caderao, 39-anyos, ulitawo ug nagpuyo sa barangay West Poblacion kinsa gabaktas kilid sa karsada.
Gumikan sa hitabo, natumba ang maong konsehal ug nabunal ang ulo sa karsada samtang si Caderao nakangkon og bun-og sa tuong bukton.
Nasayran sa taho nga wala magsul-ob og crash helmen ang natumbok nga biktima. (Andy Nalzaro)
Tags: local crimes
Posted in Local News / Bohol Balita | No Comments »
Written by boholbalita on 09 March 2010
EDUKASYON, kakabus ug trabaho maoy kasagaran nga atimanon sa mga magpapili sa umaabot nga eleksiyon atol sa gihimong Candidates’ Forum sa Holy Name University gym sa dakbayan sa Tagbilaran niadtong Biyernes sa gabii.
Nitambong sa maong forum nga dunay temang Choices and Voices mao sila si Kongresista Edgar Chatto sa unang distrito sa Bohol, Bise Gobernador Julius Cesar Herrera ug Cesar Montano nga pulos magpapili sa pagka-gobernador.
Nitambong usab sila si kanhi Gob. Rene Relampagos, Konsehal Oscar Glovasa nga magpapili isip representante sa unang distrito.
Lakip nga nitumaw mao si Mayor Dan Lim ug Bise Mayor Jose Antonio Veloso kinsa maoy magtakus sa pagka-mayor sa siyudad.
Ang matag kandidato gihatagan nga makasulti ug tulo ka minutos ug pagkahuman gipangutana kun unsay buhaton sulod sa 100 ka mga adlaw sa ilang paglingkod kun maoy palaran nga modaug sa piniliay.
Si Chatto ug Herrera pulos namahayag nga ilang ipadayon ang ilang mga nahimo sud sa ilang paglingkod sa kagamhanan samtang si Montano nipunting nga iyang bag-ohon ang pamulitika sa Bohol diin iyang paningkamutan nga wad-on ang korapsiyon.
Samtang si Lim ningon nga iyang tiwason ang iyang mga nasugdan nga mga proyekto sa dakbayan ug sa iyang bahin, gibutyag ni Veloso nga iyang bag-ohon pamalakad sa city hall ug ipa-implemtar ang anti-red tape. (Andy Nalzaro)
Posted in Election 2010, Local News / Bohol Balita | No Comments »
Written by boholbalita on 09 March 2010
NAALARMA na ang Sangguniang Panlungsod sa dakbayan sa Tagbilaran gumikan sa pagsaka sa kaso sa pagdagmal sa mga kababayen-an ug kabataan basi sa talaan nga nahipos sa kapulisan ug sa City Social Welfare and Development Office.
Si Konsehal Anne Mariquit Oppus, Tsirman sa Kumitiba sa Women, Children and Family Welfare sa SP nibutyag atol sa ilang sesyon niadtong Biyernes nga dako gayud ang pagsaka sa mga kaso sa tuig 2009 kun itandi sa 2008.
Matud ni Oppus nga nakigtabo ang iyang kumitiba sa City Police Station, City DSWD, Department of Education ug women’s group diin nakuha niya ang talaan sa mga kaso,
Basi sa talaan nga nakuha ni Oppus, ang kaso sa pagpanagmal kababayen-an niadtong 2008, adunay 222 ka kaso, 26 ang napasaka sa korte ug 100 niini ang na-settle apan sa 2009, adunay 375 nga kaso ang natala diin nisaka kini og 153 ka mga insidente ug dako gayud ang porsiyento ang pagsaka niini.
Samtang sa talaan sa abuso sa kabataan, sa 2008 adunay natala nga 141 ka kaso apan sa 2009 nitala kini og 151 ka kaso.
Gawas niini, gipunting usab ni Oppus nga dunay siyam ka mga babaye ang naluwas gikan sa usa ka patigayon niung siyudad nga nabiktima sa human traficking niadtong nakalabay nga bulan ug napasaka na ang kaso niini ngadto sa korte. (Andy Nalzaro)
Posted in Local News / Bohol Balita | No Comments »
Written by boholbalita on 09 March 2010
ASAWA sa usa ka seaman gitulis sa tulo ka wala mailhing armadong lalaki didto sa pinuy-anan sa biktima sa Sitio Centro, barangay Guadalupe, Carmen, Bohol niadtong milabay nga gabii.
Biktima nailhan nga si Erlinda Aguirre, hamtong ang panuigon.
Si SPO2 Ismael Saren sa Carmen Police Station nibutyag nga nahitabo ang insidente mga alas 8 sa Biyernes sa gabii samtang ang biktima kauban sa ilang mga paryente nagpahangin sa gawas sa ilang pinuy-anan dihang kalit nga nibutho ang mga suspetsado nga pulos nagbitbit og mugbong pusil ug gitionan ang biktima dayong deklarar og tulis.
Matud ni Saren nga pugsanong gipasulod ang maong biktima sa iyang balay ug gikuha ang duha ka kuwintas nga bulawan nga may pendant nga nagkantidad og P47,000, usa ka gold bracelet nga mobalor og P22,000, usa ka singsing nga bulawan nga nagkantidad og P12,000, usa ka gold wedding ring nga mokantidad og P4,000, usa ka laptap Toshiba brand nga mokantidad og P40,000, relo de pulso nga Quartz brand nga mobalor og P5,000, salaping cash nga P4,000, klase-klaseng perfume nga mobalor og P5,000, usa ka shoulder bag nga dunay pitaka nga wala matino ang sulod niini ug upat ka Nokia cellphone nga mobalor ngadto sa P8,600. Ang tanang nakuha nga butang moabot ngadto sa P148,600.
Sigun sa pakisusi sa kapulisan nga yano lamang nagbaktas ang mga tulisan paingon sa wala matino nga direksiyon.
Gihulagway sa biktima ang usa ka suspek nga dunay gitas-on nga 5′ 7″ , sakto ra ang panglawas, dunay alom sa tuong mata, tabunon ang pamanit ug gibana-banaang nagpanuigon og 30 anyos pataas ug ang usa niini dunay gitas-on nga 5 ‘ 3″, may uwat nga puti sa dughan, tabunon ang pamanit ug nagpangedaron og 30 pataas samtang wala maklaro sa maong biktima ang pamayhon sa ikatulo nga suspek. (Andy Nalzaro)
Posted in Local News / Bohol Balita | No Comments »
Written by boholbalita on 09 March 2010
USA ang namatay samtang tulo ang grabeng naangol lakip na ang usa ka polis ug duha ka mga babaye nga anak sa usa ka kanhi bise mayor dihang duha ka mga motorsikllo ang nagsungag didto sa barangay Anislag, Corella, Bohol niadtong niaging gabii.
Giila ang biktima nga si Christopher Ranes, 21-anyos, ulitawo, taga-lungsod sa Jagna. Nakaangkon ang biktima og grabeng samad sa ulo ug gikatahong napislat ang itlog niini ug nabali ang paa ug gideklarang dead on arrival kun DOA didto sa Gov. Celestino Gallares Memorial Regional Hospital sa dakbayan sa Tagbilaran.
Samtang naangol mao sila si PO1 Restituto Calimpusan, 26-anyos, ulitawo, pag-umangkon ni Sikatuna Mayor Ireneo Calimpusan ug nagpuyo sa barangay Badiang, Sikatuna, Bohol; Rexel Tocmo, 21-anyos, dalaga kinsa giingong hinigugma ni Ranes ug ang manghud niini nga si Rena Tocmo nga mga anak ni kanhi Bise Mayor Rex Tocmo ug nagpuyo sa Poblacion Corella. Ang tulo pulos gidala sa Ramiro Community Hospital sa siyudad.
Nahitabo ang insidente pasado alas 6 sa gabii niadtong Biyernes samtang si Calimpusan nagmaneho sa usa ka Honda Wave 125 nga dunay kumbinasyon nga kolor nga asul ug itom ug dunay plaka numero 7J 7589 paingon sa direksiyon sa Poblacion Corella gikan sa siyudad ug paingon na untang mopauli sa ilang dapit dihang pag-abot sa utlanan sa Kilometro 8 ug Kilometro 9, ni-overtake siya og laing motorsiklo ug iyang gikasugat ang motorsiklo nga gimanehoan ni Ranes nga usa gihapon ka Honda Wave paingon sa lahi nga direksiyon nga niresulta sa pagkabangga.
Si PO1 Renato Sinajon sa Corella Police Station nibutyag nga si Calimpusan kinsa gikan pa sa Sugbu ug niadto sa siyudad aron mopalit og duyan kay didto na kini madestino sa 704th Regional Mobile Group sa barangay Catagbacan, Loon, Bohol sugod unta ning adlawa.
“Naay gi-obertikan ug nikawas na sa linya ang maong pulis, ” asoy ni Sinajon.
Ang duha ka motorsiklo gidala sa Corella PNP. (Andy Nalzaro)
Posted in Local News / Bohol Balita | No Comments »
Written by boholbalita on 09 March 2010
PITO ka mga pamilya ang nawad-an og pinuy-anan dihang unom ka mga balay ang naugdaw sa usa ka sunog nga nahitabo didto sa dalan Peñaflor, barangay Booy, dakbayan sa Tagbilaran kagahapon sa buntag.
Si Fire Officer 2 Lito Iroy sa Tagbilaran City Fire Station nibutyag nga ang insidente nagsugod mga alas 4 sa buntag.
Mga biktima nailhan nga sila Gerardo Sibayan Jr., Tiburcio Balate, Melchor Galao, Nieves Cabulao, Joseph Galao, Gerardo Sibayan Sr. ug Luis Galao Jr.
Matud ni Iroy nga ang kalayo nagsugod sa sulod sa tindahan ni Gerardo Sibayan Jr. ug paspas kining nitabok sa kasikbit nga mga balay nga kasagaran hinimo sa mga light materials.
” Unom ka mga balay ang naugdaw diin ang usa niini gipuy-an og duha ka pamilya, ” asoy pa ni Iroy.
Dugang ni Iroy nga ilang gisubay nga dunay flying connection sa linya sa koryente maoy malagmit nga hnungdan sa maong sunog.
Mokabat ngadto sa P400,000 ang gibana-banaang danyos sa hitabo samtang walay gikatahong naangol sa natumbok nga insidente. (Andy nalzaro)
Posted in Local News / Bohol Balita | No Comments »
Written by boholbalita on 09 March 2010
USA ka gambalay sa tunghaan sa elementarya ang naugdaw sa wala mahibaw-ing hinungdan sa sunog didto sa barangay Botoc, Loay, Bohol kagahapon sa buntag.
Nahitabo ang insidente mga alas 8 sa buntag diin ang kalayo nagsugod sa lawak sa Grade One sa Botoc Elementary School.
Si PO2 Jonathan Buscato sa Loay Police Station nibutyag nga ang mga kabomberohan sa Loay wala makatabang sa pagpalong sa kalayo gumikan kay gubaon ang firetruck niini
Matud ni Buscato nga igo lamang nga ni-assist ang mga sakop sa Loay Fire Station sa Dimiao Fire Station nga nakaabot sa maong lugar.
Gibana-banaang moabot ngadto sa usa ka milyon ka pesos ang kinatibuk-ang danyos sa upat ka classroom nga building.
Padayon pang gisusi sa Laoy Fire Statioon kun unsay hinungdan sa maong insidente. (Andy Nalzaro)
Posted in Local News / Bohol Balita | No Comments »
Written by boholbalita on 09 March 2010
SI vice gubernatorial candidate, Dr. Elpidio Jala sa Liberal Party mipalig-on na sa iyang mga lideres didto sa ikaduhang distrito sa Bohol alang sa iyang preparasyon sa nagsingabot nga piniliay karong Mayo 10, 2010.
Ang kanhi Dep Ed Superintendent nga si Jala nibutyag nga iyang giuna sa pagpahimutang og mga lider sa nagkalain-laing mga barangay sa kalungsuran sa maong distrito gumikan sa gilay-on niini.
Matud ni Jala nga duna nay mga magtutudlo, mga kooperatiba, mga mag-uuma, mangingisda ug grupo sa mga sa non-governmental organization, religious organzations ang iyang giduol diin nagpakita og interes sa pagpaluyo sa iyang kandidatura.
Samtang gilauman usab niya nga ang mga lider sa iyang igsuon nga si kanhi Kongresista Eladio “Boy” Jala sa ikatulong distrito mopaluyo sa iyang tinguha.
Gibutyag usab ni Jala nga adunay 14 ka mga kandidato sa pagkamayor ubos sa partidong Liberal.
Samtang sa dakbayan sa Tagbilaran, gilauman usab si Jala nga paluyohan siya sa mga lider ni Mayor Dan Lim gumikan sa iyang pagserbisyo sa siyudad isip Dep Ed Supt.
Dugang ni Jala nga masaligon siya nga dalhon siya mga tawo ni Mayor Lim.
Si Jala kinsa maoy nag-una sa gihimong survey sa Bohol Balita, nag-una usab sa gihimong survey sa University of Bohol Research Center sa dakbayan diin nagsunod kaniya si kanhi provincial administrator, Atty. Tomas Abapo ug ikatulo lamang si ABC pres. Conching Lim. (Andy Nalzaro)
Posted in Election 2010, Local News / Bohol Balita | No Comments »
Written by boholbalita on 06 March 2010
SI gubernatorial candidate Cesar “Buboy Montano sa partido Liberal wala motumaw sa gihimong rally sa ticket ni kanhi Presidente Joseph ‘Erap” Estrada kagabii.
Ang premyadong aktor ug direktor namahayag sa pakighinabi sa dyRD kagahapon nga dili gayud siya mopatim-aw sa maong kalihukan bisan og ituboy siya ni Estrada isip guest candidate sa Puwersa ng Masa ng Pilipino kun PMP.
Matud ni Montano nga dako gayud ang iyang pagpasalamat ug dungog nga iendorso ni Estrada isip guest candidate apan dili gayud siya motambong niini gumikan kay nagbaton siya og delikadeza isip siya maoy chairman sa partido nila ni presidential candidate, Senador Noynoy Aquino III ug vice presdidential candidate, Sen. Mar Roxas.
Gipanghimakak usab ni Montano ang ningguwa nga taho nga moambak siya sa PMP gumikan kay nagpabiling lig-on ang LP sa lalawigan sa Bohol. (Andy Nalzaro)
Posted in Election 2010, Local News / Bohol Balita | No Comments »
