MANILA, May 24 (PIA)–Gilagdaan na kagahapon ni Presidente Benigno ‘Noynoy’ Aquino III ang Republic Act 10844 nga magmugna sa Department of Information and Communications Technology (DICT).
Sigon sa balaod, ang DICT pamunoan sa usa ka Secretary, kauban ang 3 ka Undersecretaries ug 4 ka Assistant Secretaries.
Nahisulod usab sa maong balaod nga ang Secretary, Undersecretaries ug Assistant Secretaries angay adunay pito (7) ka kapasidad ug kaalam kun expertise sa information and communications technology; information technology service management; information security management; cybersecurity; data privacy, ug e-Commerce o human capital development sa ICT sector.
Tungod niining bag-ong balaod, pipila ka ahensiya ang papason na ug ibalhin sa DICT sama sa Information and Communications Technology Office (ICTO); National Computer Center (NCC); National Computer Institute (NCI); Telecommunications Office (TELOF); National Telecommunications Training Institute (NTTI); ug tanang operating units sa Department of Transportation and Communications (DOTC) nga may kalabotan sa komunikasyon.
Tungod sa pagmugna niining bag-ong departamento, ang kasamtangang DOTC, tawagon na lamang og Department of Transportation.
Nakalatid usab sa maong bag-ong balaod ang unom ka buwan nga transition period gikan sa full implementation sa pagbalhin sa mga katungdanan, kabtangan ug personnel.
Kasamtangan ang mga apektadong kawani magpabilin sa nagkadaiyang posisyon hangtud nga may ibutang nang mga opisyal sa DITC. (ecb/PIA7-Bohol)
