TAGBILARAN CITY, July 21 (PIA)–Gibuksan kagahapon ang Sandugo Trade Expo 2016 diin 123 ka exhibitors ang nisalmot didto sa Island City Mall ning dakbayan.
Matud pa ni Department of Trade and Industry (DTI) Central Visayas Regional Director Aster Caberte, ang regional expo midaghan gikan sa 99 ka exhibitors sa niaging tuig ngadto na sa 123 karon.
Ang pagdaghan sa mga nisalmot nga exhibitors tungod sa paglambo sa ekonomiya sa lalawigan sa Bohol nga nakapadani sa mga mamamalit ug exhibitors matud pa ni Caberte.
Ang maong regional trade fair nga gibuksan kagahapon ug matapos sa Hulyo 25, nagtanyag sa mga produktong sama sa mga pagkaon, dulaan, alahas, muwebles, housewares, novelty items ug uban pang lumad nga produktong gikan sa Rehiyon 6, 7, 8, 9 ug 10.
Ika-11 na kini nga regional marketing fair nga nakitang magpakusog sa performance sa local micro small and medium enterprises, usa ka nagtubong pamuhonan sa Bohol.
Gipangunahan ni Gob. Edgar Chatto kauban nilang Balilihan Mayor Pureza Veloso-Chatto, Dir. Caberte ug DTI Bohol OIC Provincial Director Maria Soledad Balistoy ang seremonya sa ribbon cutting nga nagbukas sa Sandugo Trade Expo 2016 kagahapon sa hapon.
Gitambongan usab kini nila Bohol Chamber of Commerce and Industry (BCCI) President Albert Uy, Bohol Association of Hotels, Resorts and Restaurants (BAHRR) President Rommel Gonzales ug City Councilor Jojo Bompat nga representante ni Tagbilaran City Mayor Baba Yap. (ecb/PIA7-Bohol)
